19-نۆۋەتلىك خەلق قۇرۇلتىيىدا ئىقتىسادىي تەرەققىياتنىڭ يىراق كەلگۈسى نىشانى ئوتتۇرغا قويۇلدى

يەرشارى تورى ئاخبارات ئۇنىۋېرسال خەۋىرى: ئىسپانىيەنىڭ كاتالۇنا رايونىدىكى مۇستەقىللىق دۇلقۇنى پۈتۈن دۇنيا پۇل-مۇئامىلە بازىرىدا زور داۋالغۇش پەيدا قىلغان پەيتتە، جۇڭگونىڭ ساغلام ۋە مۇقىم ئاشقان ئىچكى ئىشلەپچىقىرىش ئومۇمىي قىممىتى سانلىق مەلۇماتى خەلقئارا پۇل-مۇئامىلە بازىرىغا نىسبەتەن زور تەسەللىي بولدى. 10-ئاينىڭ 19-كۈنى دۆلەت ئىستاتېستىكا ئىدارىسىنىڭ تور بېكىتىدە ئېلان قىلىنىشىچە، جۇڭگونىڭ 3-پەسىللىك ئىچكى ئىشلەپچىقىرىش ئومۇمىي قىممىتى (GDP) ئوخشاش مەزگىلدىكىدىن %6.8 ئاشقان، بۇ يىل ئالدىنقى ئۈچ پەسىللىك ئىچكى ئىشلەپچىقىرىش ئومۇمىي قىممىتى (GDP) ئوخشاش مەزگىلدىكىدىن %6.9 ئاشقان، بازارنىڭ كۆزلىگەن نىشانىغا يەتكەن.
سىرتقى تاراتقۇلار جۇڭگونىڭ ئىقتىسادىي سانلىق مەلۇماتىغا كۆڭۈل بۆلگەندىن باشقا يەنە، چارشەنبە كۈنى ئېلان قىلىنغان 19-نۆۋەتلىك مەملىكەتلىك خەلق قۇرۇلتىيىدا ئوتتۇرغا قويۇلغان «جۇڭگونىڭ ئىقتىسادىي تەرەققىيات نىشانى»غا ئالاھىدە دىققەت قىلدى.
ياپونىيە «كۈندىلىك خەۋەرلەر» گېزىتىنىڭ خەۋىرىگە قارىغاندا، ج ك پ 19-نۆۋەتلىك خەلق قۇرۇلتىيى دوكلاتىدا، جۇڭگونىڭ «دۇنيادىكى ئىقتىسادىي كۈچلۈك دۆلەت»كە ئايلىنىش نىشانى ئېنىق ئىپادىلەنگەن، جۇڭگونىڭ كېيىنكى سىياسەت يۆنىلىشىمۇ دۇنيادىكى ھەرقايسى دۆلەتلەرگە زور تەسىر كۆرسىتىدىكەن.
ئاۋسترالىيە «مالىيە-ئىقتىساد ئوبزورى» تور بېكىتىنىڭ 19-ئۆكتەبىردىكى خەۋىرىگە قارىغاندا، 19-نۆۋەتلىك خەلق قۇرۇلتىيى دوكلاتىدا، 2050-يىلىغىچە بولغان جۇڭگونىڭ يىراق كەلگۈسى ئىقتىسادىي تەرەققىيات نىشانى ئوتتۇرغا قويۇلغان. 2050-يىلىغىچە، جۇڭگو تىرىشىپ «زامانىۋىلاشقان كۈچلۈك دۆلەت» كە ئايلىنىدىكەن، دۇنيا بانكىلىرىنىڭ ئۆلچىمى بويىچە كەلگۈسى 35 يىلدا، جۇڭگو ئاھالىلىرىنىڭ كىشى بېشى ئوتتۇرىچە كىرىمى ئاز بولغاندىمۇ يىلىغا %4.9 لىك سۈرئەت بىلەن ئاشۇرۇلىدىكەن. يولداش شى جىنپىڭ يەنە ئىجتىمائىي پاراۋانلىق، كىرىمنىڭ تەڭپۇڭسىزلىقى، داۋالىنىش ۋە ساقلىقنى ساقلاش قاتارلىق جەھەتلەردىكى مەسىلىلەرگە ئالاھىدە ئەھمىيەت بېرىلىدىغانلىقىنى تەكىتلىگەن.

ئەسكەرتىش: مەزكۇر ماقالە ئىلكان تورى تەرىپىدىن تەرجىمە قىلىنغان، قالايمىقان كۆچۈرۈش ۋە ئۆزگەرتىپ تارقىتىش بىردەك چەكلىنىدۇ، ئەگەر يۇقىرقىدەك ئەھۋاللار بايقالسا قانۇنىي جاۋابكارلىقى سۈرۈشتە قىلىنىدۇ.