مەركىزىي بانكىلارنىڭ ئەڭ يېڭى پۇل سىياسىتى

FX168مالىيە-ئىقتىساد گېزىتى خەۋىرى، ئىلكان تورى تەرجىمىسى: شەنبە كۈنى (1-ئاينىڭ 20-كۈنى) ئامېرىكا ئاۋام پالاتاسى ماقۇللىغان ۋاقىتلىق چىقىم لايىھەسى كېڭەش پالاتاسىنىڭ ماقۇللۇقىدىن ئۆتمىدى، ئامېرىكا ھۆكۈمىتىنىڭ مەلۇم قىسىمى تاقىلىپ قالدى، بۇ خەۋەردىن باشقا پۇل-مۇئامىلە بازىرى بۇ ھەپتىدە يەنە ياۋرۇپا مەركىزىي بانكىسى ۋە ياپونىيە مەركىزىي بانكىسىنىڭ ئۆسۈم نىسبىتى يىغىنىنى كۈتۈۋالىدۇ. بۇ ھەپتىدىكى بازار ھەمدە ياۋرۇنىڭ ئىپادىسىگە قارىتا، Barclays بانكىسىنىڭ تەھلىلچىلىرى تۆۋەندىكىدەك تەھلىل يۈرگۈزدى:
G3 دۆلەتلىرى رەھبەرلىك قىلغان دۇنيا ئىقتىسادى ماس قەدەمدە ئەسلىگە كېلىپ، يادرولۇق مەركىزىي بانكا پۇل سىياسىتىنىڭ نورماللىشىش مۆلچەرىگە ئاساس سالدى. ياۋرۇپا مەركىزىي بانكىسىنىڭ قىسمەن كۆزلىمىسى ياۋرۇنىڭ ئۆسۈشىنى ئىلگىرى سۈردى، يىننىڭ ئىپادىسى 2018-يىلنىڭ كېينكى يېرىمىدا كۆرۈنەرلىك بولۇشى مۇمكىن. بۇ ھەپتىلىك ئەھۋالدىن قارىغاندا، ياۋرۇپا مەركىزىي بانكىسى ۋە ياپونىيە مەركىزىي بانكىسى پۇل سىياسىتىنىڭ ئىزچىللىقىنى تەكىتلىشى مۇمكىن. پۇل-مۇئامىلە بازىرى نۆۋەتتە ياۋرۇپا مەركىزىي بانكىسىنىڭ پۇل سىياسىتى جەھەتتە ئۆزگىرىش قىلىش-قىلماسلىقى توغرىسىدىكى ئۇچۇرلارغا دىققەت قىلماقتا، ئەمما ياۋرۇپا مەركىزىي بانكىسىنىڭ نۆۋەتتىكى «قاتتىق قول» پۇل سىياسىتى كۆزلىمىسىنى يەنىمۇ ئىلگىرى سۈرۈش تەدبىرىنى يولغا قويۇشى ئېھتىمالدىن يەنىلا يىراق.

ئەسكەرتىش: مەزكۇر ماقالە ئىلكان تورى تەرىپىدىن تەرجىمە قىلىنغان، قالايمىقان كۆچۈرۈش ۋە ئۆزگەرتىپ تارقىتىش بىردەك چەكلىنىدۇ، ئەگەر يۇقىرقىدەك ئەھۋاللار بايقالسا قانۇنىي جاۋابكارلىقى سۈرۈشتە قىلىنىدۇ.