نېفىت زاپسى ئومۇميۈزلۈك تۆۋەنلىشى مۇمكىن

FX168 مالىيە-ئىقتىساد گېزىتى خەۋىرى، ئىلكان تورى تەرجىمىسى: ئالدىنقى ئايدا نېفىت ئېكسپورت قىلغۇچى دۆلەتلەر تەشكىلاتى (OPEC) باشچىلىق قىلغان مەھسۇلاتنى كېمەيتىش كېلىشىمى 2018-يىلى 3-ئايغىچە ئۇزارتىلغان بولسىمۇ، بىراق تېخىمۇ چوڭ بولغان مەھسۇلاتنى كېمەيتىش تەدبىرلىرى تۈزۈلمىگەچكە نېفىت بازىرى يەنىلا كاساتلىشىش ئەھۋالىدىن قۇتۇلالمىدى، ماي باھاسى %10 تۆۋەنلىدى. شۇنداقتىمۇ، سەئۇدى ئەرەبىستان بىلەن رۇسيەنىڭ ئىنېرگىيە مىنىستىرى يەكشەنبە كۈنى (6-ئاينىڭ 11-كۈنى) ئېچىلغان بىرلەشمە ئاخبارات ئېلان قىلىش يىغىنىدا،ماي باھاسى تۆۋەنلىگەندىن كېيىن، نېفىت زاپسى داۋاملىق تۆۋەنلەيدۇ دەپ مۆلچەرلىدى.
رۇسيەنىڭ ئىنېرگىيە مىنىستىرى Alexander Novak مۇنداق دەپ قارىدى: يېقىندا ماي باھاسى ئامېرىكا خام نېفىت زاپسىنىڭ كۈتۈلمىگەن دەرىجىدە ئېشىشى تۈپەيلىدىن تۆۋەنلىدى، نېفىت ئىشلەپچىقارغۇچى دۆلەتلەر تەشكىلاتىنىڭ بازاردىكى تەمىنلەش بىلەن ئېھتىياجنى تەڭپۇڭلاشتۇرۇش ئۈچۈن يولغا قويغان مەھسۇلاتنى كېمەيتىش ئىستراتېگىيىسى2018-يىلنىڭ بىرىنچى پەسلىدە ئۈنۈمگە ئېرىشىشى مۇمكىن.
شۇنىڭ بىلەن بىر ۋاقىتتا، (OPEC) تەشكىلاتىدىكى ئەڭ چوڭ نېفىت ئىشلەپچىقارغۇچى دۆلەت-سەئۇدى ئەرەبىستاننىڭ ئىنېرگىيە مىنىستىرى Khalid Al-Falih مۇنداق دەپ كۆرسەتتى: نېفىت زاپسى يەرشارى مىقياسىدا تۆۋەنلەيدۇ ھەمدە كەلگۈسى 4-3 ئايدا تېز سۈرئەت بىلەن تۆۋەنلەيدۇ، ئاخىرىدا 2017-يىلىنىڭ ئاخىرىدىن بۇرۇن (OPEC)تەشكىلاتىنىڭ بەش يىللىق ئوتتۇرىچە قىممىتىنىڭ كۆزلەنگەن نىشانىغا يېتىدۇ. ئەگەر مەھسۇلاتنى كېمەيتىش كېلىشىمى كۈتكەندەك ئۈنۈمگە ئېرىشەلمىسە، سىياسەت قايتىدىن ئۆزگەرتىلىدۇ.

ئەسكەرتىش: مەزكۇر ماقالە ئىلكان تورى تەرىپىدىن تەرجىمە قىلىنغان، قالايمىقان كۆچۈرۈش ۋە ئۆزگەرتىپ تارقىتىش بىردەك چەكلىنىدۇ، ئەگەر يۇقىرقىدەك ئەھۋاللار بايقالسا قانۇنىي جاۋابكارلىقى سۈرۈشتە قىلىنىدۇ.