دۇنيا بويىچە 2-چوڭ ئالتۇن ئىستىمال دۆلىتىنىڭ ئېھتىياجى ئەسلىگە كەلدى

FX168مالىيە-ئىقتىساد گېزىتى خەۋىرى، ئىلكان تورى تەرجىمىسى: خەلقئارا نەق ئالتۇن باھاسى تۆۋەنلىگەنلىكى ھەمدە دۆلەتنىڭ ئىچكى ئېھتىياجى ئاشقانلىقى تۈپەيلىدىن، ھىندىستاننىڭ 2017-يىلىدىكى ئالتۇن ئىمپورت مىقدارى 2016-يىلىدىكى 550 توننىدىن %53 ئېشىپ 846 توننىغا يەتتى، بۇ دۇنيا بويىچە 2-چوڭ ئالتۇن ئىستىمال دۆلىتىنىڭ ئېھتىياجىنىڭ ئەسلىگە كەلگەنلىكىنى كۆرسىتىپ بېرىدۇ.
ھىندىستاندىكى ئەڭ چوڭ ئالتۇن پىششىقلاش سودىگىرى MMTC-PAMP India نىڭ سانلىق مەلۇماتىغا ئاساسلانغاندا، ھىندىستاننىڭ بۇلتۇرقى ئالتۇن ئىمپورت مىقدارى زور دەرىجىدە ئاشقان بولۇپ، پەقەت 12-ئايدىلا ئىمپورت مىقدارى 70 توننىغا يەتكەن، 2016-يىلنىڭ ئوخشاش مەزگىلىدىكى بىلەن سېلىشتۇرغاندا 49 توننا ئاشقان، ئېشىش نىسبىتى %42 بولغان.
MMTC-PAMP نىڭ لىدىرى Vipin Raina نىڭ بىلدۈرۈشىچە، پەسىللىك ئېھتىياج ۋە توي-مۇراسىم پەسلىدىكى ئېھتىياج كۈچلۈك بولغانلىقتىن، ئۇنىڭدىن باشقا خەلقئارا ئالتۇن باھاسى تۆۋەنلىگەنلىكتىن، بۇلتۇر ھىندىستاننىڭ ئالتۇن ئېھتىياجى زور دەرىجىدە ئاشقان.
پەيشەنبە كۈنى (1-ئاينىڭ 18-كۈنى) ئاسىيا بازىرىدا ئالتۇن باھاسى 1327 دوللار ئەتراپىدا بولۇپ، بۇيىل كىرىپ ھازىرغىچە تەخمىنەن %2 ئۆسكەن، ئۆتكەن بىر يىلدا ئالتۇن باھاسى جەمئىي %13 ئۆسكەن ئىدى.
كەسپىي مۇتەخەسىسلەرنىڭ بىلدۈرۈشىچە، ھىندىستان 2017-يىلى 7-ئايدا %3 لىك تاۋار ۋە مۇلازىمەت بېجى (GST)نى يولغان قويغان بولۇپ، بۇ ئالتۇن ئېھتىياجىغا بەلگىلىك تەسىر كۆرسەتكەن.

ئەسكەرتىش: مەزكۇر ماقالە ئىلكان تورى تەرىپىدىن تەرجىمە قىلىنغان، قالايمىقان كۆچۈرۈش ۋە ئۆزگەرتىپ تارقىتىش بىردەك چەكلىنىدۇ، ئەگەر يۇقىرقىدەك ئەھۋاللار بايقالسا قانۇنىي جاۋابكارلىقى سۈرۈشتە قىلىنىدۇ.